Dangerous Animals List: ప్రాణాంతక జంతువులు అంటే చాలా మందికి సింహాలు, పులులు, మొసళ్లు వంటి వేటాడే జంతువులే గుర్తుకు వస్తాయి. కానీ ప్రకృతిలో కొన్ని జీవులు చడి చప్పుడు లేకుండా.. మనుషుల ప్రాణాలను తీయగలవు. కొన్ని విషపదార్థాల ద్వారా, మరికొన్ని వ్యాధులను వ్యాప్తి చేయడం ద్వారా, ఇంకొన్ని తమ చర్మం లేదా శరీరంలోని టాక్సిన్ల ద్వారా ప్రమాదాన్ని సృష్టిస్తాయి. ఈ జీవులు నిశ్శబ్దంగా పనిచేసే హంతకులుగా గుర్తింపు పొందాయి. అలాంటి వాటిలో ఈ ఐదింటి గురించి తెలుసుకుందాం..
దోమ
Mosquito పరిమాణంలో చిన్నదే అయినప్పటికీ, ప్రపంచవ్యాప్తంగా అత్యధిక మరణాలకు కారణమయ్యే జీవిగా దోమను భావిస్తారు. దోమలు నేరుగా విషం చిమ్మకపోయినా, మలేరియా, డెంగ్యూ, చికున్గున్యా, జికా వైరస్, ఎల్లో ఫీవర్ వంటి ప్రమాదకర వ్యాధులను వ్యాప్తి చేస్తాయి. ప్రతి సంవత్సరం లక్షలాది మంది ఈ వ్యాధుల కారణంగా ప్రాణాలు కోల్పోతున్నారు. అందుకే దోమను ‘సైలెంట్ కిల్లర్’ అని కూడా పిలుస్తారు.
పఫర్ ఫిష్:
Pufferfish సముద్రంలో కనిపించే విచిత్రమైన చేపల్లో పఫర్ ఫిష్ ఒకటి. ప్రమాదం అనిపించినప్పుడు ఇది తన శరీరాన్ని బెలూన్లా ఉబ్బించుకుంటుంది. అయితే దీని అసలు ప్రమాదం శరీరంలోని ‘టెట్రోడోటాక్సిన్’ అనే విషపదార్థం. ఇది సైనైడ్ కంటే ఎన్నో రెట్లు ప్రమాదకరమైనదిగా పరిగణిస్తారు. సరైన విధంగా శుభ్రం చేయకుండా వండిన పఫర్ ఫిష్ను తింటే శరీరం క్రమంగా పక్షవాతానికి గురై మరణం సంభవించే అవకాశం ఉంటుంది.
గోల్డెన్ పాయిజన్ కప్ప:
Golden Poison Frog దక్షిణ అమెరికాలోని వర్షారణ్యాల్లో కనిపించే ఈ చిన్న కప్ప ప్రపంచంలోని అత్యంత విషపూరిత జీవుల్లో ఒకటి. దీని చర్మంపై ఉండే ‘బాట్రాకోటాక్సిన్’ అనే విషం నాడీ వ్యవస్థపై తీవ్ర ప్రభావం చూపుతుంది. పరిశోధకుల అంచనాల ప్రకారం.. ఒక గోల్డెన్ పాయిజన్ కప్పలో ఉండే విషం అనేక మంది మనుషులను చంపగల సామర్థ్యాన్ని కలిగి ఉంటుంది. కేవలం చర్మాన్ని తాకడం ద్వారానే ప్రమాదం సంభవించే అవకాశం ఉండటంతో ఇది అత్యంత జాగ్రత్తగా చూడాల్సిన జీవిగా గుర్తించబడింది.
స్పిట్టింగ్ కోబ్రా :
Spitting Cobra సాధారణ నాగుపాముల మాదిరిగా కాటు వేయడమే కాకుండా, స్పిట్టింగ్ కోబ్రా తన విషాన్ని దూరం నుంచి చిమ్మగల ప్రత్యేక సామర్థ్యాన్ని కలిగి ఉంటుంది. ఈ విషం కళ్లలో పడితే తీవ్రమైన నొప్పి, చూపు కోల్పోవడం వంటి సమస్యలు తలెత్తవచ్చు. అవసరమైతే కాటు ద్వారా కూడా ప్రాణాంతక విషాన్ని శరీరంలోకి పంపుతుంది. అందుకే ఆఫ్రికా, ఆసియా ప్రాంతాల్లో ఈ పామును అత్యంత ప్రమాదకరమైన జాతిగా పరిగణిస్తారు.
రఫ్-స్కిన్న్డ్ న్యూట్:
Rough-skinned Newt ఉత్తర అమెరికాలో కనిపించే ఈ చిన్న ఉభయచర జీవి చూడటానికి హానికరంగా అనిపించదు. కానీ దీని చర్మంలో కూడా టెట్రోడోటాక్సిన్ అనే అత్యంత శక్తివంతమైన విషం ఉంటుంది. ఈ విషం నాడీ వ్యవస్థ పనితీరును దెబ్బతీసి శ్వాసకోశ వైఫల్యానికి దారితీయవచ్చు. ప్రకృతిలో శత్రువుల నుంచి రక్షించుకోవడానికి ఈ జీవి ఈ విషాన్ని ఉపయోగిస్తుంది.