US military sleep trick: నేటి వేగవంతమైన జీవనశైలిలో చాలామంది నిద్రలేమి సమస్యతో బాధపడుతున్నారు. పనిఒత్తిడి, ఆర్థిక సమస్యలు, కుటుంబ బాధ్యతలు, మొబైల్ ఫోన్ల అధిక వినియోగం వంటి కారణాల వల్ల రాత్రి వేళల్లో నిద్ర పట్టక ఇబ్బంది పడుతున్నారు. అయితే కొందరు ఆరోగ్య నిపుణులు త్వరగా నిద్రలోకి జారుకునేందుకు ఒక ప్రత్యేక శ్వాస వ్యాయామాన్ని సూచిస్తున్నారు. దీనినే చాలామంది ‘మిలటరీ స్లీప్ ట్రిక్’గా పిలుస్తారు. దీనిని పాటించి వారు తొందరగా నిద్రపోతారు. ఈ ట్రిక్ ఎలా ఉంటుందంటే?
ఈ పద్ధతిలో భాగంగా మొదట ప్రశాంతంగా మంచంపై పడుకుని శరీరాన్ని పూర్తిగా రిలాక్స్ చేసుకోవాలి. ఆ తర్వాత నాలుగు సెకన్ల పాటు మెల్లగా శ్వాసను లోపలికి తీసుకోవాలి. అనంతరం ఏడు సెకన్ల పాటు శ్వాసను ఆపి ఉంచాలి. తర్వాత ఎనిమిది సెకన్ల వ్యవధిలో నెమ్మదిగా గాలిని బయటకు వదలాలి. ఈ ప్రక్రియను కొన్ని సార్లు పునరావృతం చేయడం ద్వారా శరీరం, మనసు రెండూ ప్రశాంత స్థితికి చేరుకుంటాయని నిపుణులు చెబుతున్నారు.
ఏడు సెకన్ల పాటు శ్వాసను నిలిపి ఉంచడం వల్ల శరీరంలో ఆక్సిజన్ వినియోగం మెరుగుపడుతుందని, మెదడుకు ప్రశాంతత కలుగుతుంది. అలాగే ఒత్తిడికి కారణమయ్యే హార్మోన్ల ప్రభావం తగ్గి, ఆందోళన క్రమంగా తగ్గే అవకాశం ఉంటుంది. దీంతో మనసు ప్రశాంతంగా మారి నిద్రకు అనుకూలమైన పరిస్థితి ఏర్పడుతుంది.
ఈ శ్వాస విధానాన్ని అనుసరించే ముందు రోజంతా ఎదురైన సమస్యలు, ఆందోళనలు, పనిభారం వంటి ఆలోచనలను కొంతసేపు పక్కన పెట్టాలని నిపుణులు సూచిస్తున్నారు. నిద్రకు ముందు మనసును ప్రశాంతంగా ఉంచడం కూడా ఈ పద్ధతి విజయవంతంగా పనిచేయడంలో కీలక పాత్ర పోషిస్తుంది.
కొందరు చెబుతున్న సమాచారం ప్రకారం.. అమెరికా మిలటరీ సిబ్బంది కూడా ఇలాంటి రిలాక్సేషన్, శ్వాస పద్ధతులను ఉపయోగిస్తారని చెబుతారు. క్లిష్టమైన పరిస్థితుల్లోనూ తక్కువ సమయంలో విశ్రాంతి తీసుకుని తిరిగి విధులకు సిద్ధం కావడానికి ఇవి సహాయపడతాయని అంటారు. అయితే దీనిపై వివిధ రూపాల్లో సమాచారం ఉన్నప్పటికీ, వ్యక్తిగతంగా ఫలితాలు మారవచ్చు.
అయితే నిద్రలేమి సమస్య తరచుగా కొనసాగితే కేవలం ఈ ట్రిక్పైనే ఆధారపడకుండా వైద్యులను సంప్రదించడం మంచిది. సరైన నిద్ర అలవాట్లు, సమయానికి నిద్రపోవడం, కాఫీన్ తగ్గించడం, స్క్రీన్ టైమ్ నియంత్రించడం వంటి చర్యలతో పాటు ఈ శ్వాస వ్యాయామాన్ని అనుసరిస్తే మంచి ఫలితాలు పొందే అవకాశం ఉంటుంది.