River Indie Gen 3 electric scooter: ఈ స్కూటర్ మనుషులతో పాటు బరువులను మోసుకెళ్తుంది..

River Indie Gen 3 electric scooter: భారత్ లో ఎలక్ట్రిక్ స్కూటర్లకు డిమాండ్ పెరుగుతున్న నేపథ్యంలో ‘రివర్ ఇండీ’ (River Indie) ఎలక్ట్రిక్ స్కూటర్ కొత్త మోడల్ ను పరిచయం చేసింది. ‘Gen 3’ వెర్షన్ తో వచ్చిన ఇది ‘స్కూటర్ల SUV’గా ప్రాచుర్యం పొందుతోంది. ఇది కేవలం సాధారణ ప్రయాణానికే కాకుండా, భారీ లోడ్లు మోయడానికి, కఠినమైన రోడ్లపై ప్రయాణించడానికి రూపొందించబడింది. దీని పనితీరు ఎలా ఉందంటే?

River Indie Gen 3 స్కూటర్ లో అత్యంత శక్తివంతమైన 6.7 kW పీక్ పవర్ కలిగిన మిడ్ డ్రైవ్ మోటార్‌ ను అమర్చారు. ఇందులో 4 kWh బ్యాటరీ ప్యాక్ ఉంది, ఇది ‘ఇండియన్ డ్రైవింగ్ సైకిల్’ ప్రకారం ఒక్కసారి ఛార్జ్ చేస్తే సుమారు 163 కిలోమీటర్ల వరకు రేంజ్‌ను అందిస్తుంది. గరిష్టంగా గంటకు 90 కిలోమీటర్ల వేగంతో దూసుకెళ్లే ఇందులో ఈకో, రైడ్, రష్ అనే మూడు రైడింగ్ మోడ్లు ఉన్నాయి. 14 అంగుళాల పెద్ద అల్లాయ్ వీల్స్ ఉండటం వల్ల గుంతలు, ఎగుడుదిగుడు రోడ్లపై కూడా ఇది చాలా సులభంగా, స్థిరంగా ప్రయాణిస్తుంది.

భద్రత పరంగా చూస్తే ఇందులో ఉన్న 200mm డిస్క్ బ్రేక్స్ (ముందు, వెనుక), కంబైన్డ్ బ్రేకింగ్ సిస్టమ్ (CBS) దీనికి అదనపు బలాన్ని ఇస్తాయి. పార్కింగ్ సులభతరం చేయడానికి ‘రివర్స్, ఫార్వర్డ్ పార్కింగ్ అసిస్ట్’ ఫీచర్ కూడా ఉంది. వర్షాలు, దుమ్ము వంటి వాటి నుండి రక్షణ కోసం మోటార్ మరియు బ్యాటరీకి IP67 రేటింగ్ ఇచ్చారు.

ఎవరికి ఉపయోగకరం?
ఈ స్కూటర్ ప్రధానంగా రోజువారీ ప్రయాణాలతో పాటు, అదనపు అవసరాలు ఉండే వారికి ఒక వరంలా ఉంటుంది. కుటుంబాలు ప్రయాణం చేయడానికి, సామాగ్రి రవాణాకు 43 లీటర్ల భారీ అండర్ సీట్ స్టోరేజ్ , 12 లీటర్ల గ్లోవ్ బాక్స్ కలిపి మొత్తం 55 లీటర్ల స్టోరేజ్ సామర్థ్యాన్ని కలిగి ఉంది. దీంతో నిత్యం కిరాణా సరుకులు, బ్యాగులు లేదా ఇతర వస్తువులు మోసుకెళ్లే వారికి చాలా ఉపయోగకరం.

ఇందులో ఫ్రంట్ ఫుట్-పెగ్స్ వంటి ప్రత్యేక ఫీచర్లు ఉండటం వల్ల, పొడవుగా ఉన్న వ్యక్తులు కూడా సౌకర్యవంతంగా కూర్చోవచ్చు. ఇది దీర్ఘకాలిక ప్రయాణాల్లో అలసటను తగ్గిస్తుంది. దీనికి ఉన్న ‘స్టీల్ ట్యూబులర్ ఛాసిస్’ 18 డిగ్రీల గ్రేడబిలిటీ కారణంగా, కొండ ప్రాంతాల్లో లేదా కఠినమైన రోడ్లపై ప్రయాణించే వారికి ఇది ఎంతో నమ్మదగినది.

కేవలం ఆఫీసుకో లేదా కాలేజీకో వెళ్లేవారికే కాకుండా, వ్యాపార అవసరాలకు లేదా అడ్వెంచర్ రైడ్స్‌కు కూడా ఉపయోగపడేలా రివర్ ఇండీ Gen 3ని డిజైన్ చేశారు. లోడ్ ఎక్కువ మోసుకెళ్లాల్సి వస్తే లేదా సౌకర్యవంతమైన భారీ స్కూటర్ కోసం చూస్తుంటే ఇది సరైన ఎంపిక కావచ్చు.